Спяшайцеся з паэтам сустрэцца…
21.04.2022
Спяшайцеся з паэтам сустрэцца…
У канцы студзеня 2022 г. адзначыў сваё 75-годдзе наш зямляк
Віктар Рэчыц, паэт-гумарыст, журналіст, член Саюза пісьменнікаў Беларусі.
З нагоды юбілею 20 красавіка ў Івацэвіцкай раённай бібліятэцы імя П. Пестрака была арганізавана сустрэча з паэтам, на якой прысутнічалі і вучні 10 "А" класа нашай школы . Падчас сустрэчы школьнікі з захапленнем слухалі сатырычныя вершы і байкі Віктара Рэчыца, аповед самога паэта пра жыццё і літаратурную дзейнасць, пра захапленні гармонікам, пра творчыя набыткі. А гэта восем гумарыстычных кніг, апошняя – “Форс-мажор” выйшла ў 2021 г. На гэтым мастак слова не збіраецца спыняцца, а ўжо працуе - як прызнаўся сам паэт - над стварэннем дзявятай кнігі.
Віктар Трафімавіч часта друкуецца ў нашай раённай газеце “Івацэвіцкі веснік”, дзе некалі пачынаў сваю сваю журналісцкую і літаратурную дзейнасць (толькі раней газета называлася “Кастрычнік”). Пры рэдакцыі райгазеты разам з іншымі супрацоўнікамі стварыў некалі літаратурнае аб’яднанне “Узлёт”. Усё жыццё працаваў у раёнцы (амаль 40 гадоў), мае шмат публікацый у часопісе “Вожык”, з’яўляецца яго даўнім аўтарам і шчырым прыхільнікам.
У 2011 годзе Віктар Рэчыц быў дэлегатам другога з’езда пісьменнікаў Беларусі. У 2012 годзе Віктар Трафімавіч стаў пераможцам конкурсу, прысвечанага 70-годдзю часопіса “Вожык” у намінацыі “Літаратурны конкурс”.
Сустрэча з паэтам прайшла ў цёплай атмасферы. Вучні пакідалі чытальную залу бібліятэкі з добрым настроем і з усмешкамі на тварах. Паэзія Віктара Трафімавіча закранула дзіцячыя душы.
Паляшчук Г.А.,
настаўнік беларускай мовы і літаратуры