“Пагавары са мной на мове, на нашай роднай, не чужой”
03.02.2021
Сто разоў шукай другой красы,
А тым больш што свет даўно не вузкі!
…Ды калі ты не бязродны сын -
Гавары са мной па-беларуску!
Яўгенія Янішчыц.
Мова – душа народа, яго галоўны скарб. Трэба вывучаць мову, спазнаваць яе, шанаваць і берагчы.
2 лютага 2021 года падчас Тыдня беларускай мовы і літаратуры сярод вучняў 8 і 9 класаў была праведзена інтэрактыўная гульня “Размаўляем і спяваем па-беларуску”. Удзел бралі дзве каманды – “Валошкі” і “Званочкі”. Гульня садзейнічала развіццю інтэлектуальных здольнасцей вучняў і ўменню працаваць у групе. Кожны мог паспрабаваць сябе ў ролі лінгвіста.
Да мерапрыемства вучаніцамі 8 Б класа Брыль Анастасіяй і Паўловіч Аляксандрай быў падрыхтаваны відэаролік “Пагавары са мной на мове, на нашай роднай, не чужой”.
Настаўнікі і вучні школы разважалі, чаму многія размаўляюць па-руску, цытавалі ўрыўкі з твораў беларускіх паэтаў.
Гульня складалася з 5 этапаў: “Прыгадваем”, “Перакладаем”, “Тлумачым”, “Ужываем”, “Цытуем”. Удзельнікі шукалі адказы на слайд-пытанні, перакладалі словы, словазлучэнні і сказы з рускай мовы на беларускую, тлумачылі лексічнае значэнне слоў, прыгадвалі фразеалагізмы і тлумачылі іх сэнс, працягвалі цытаты . У выніку перамагла каманда “Валошкі”.
Падчас мерапрыемства гучала музыка. Падаляка Паліна, вучаніца 8 “Б” класа, выканала песню “Слуцкія ткачыхі” на словы Максіма Багдановіча.
З добрым настроем вучні пакідалі гэтае маленькае свята. Было прыемна чуць, што гульня ім спадабалася і што яны будуць старанна вывучаць беларускую мову, часцей размаўляць і спяваць па-беларуску.
Давайце не цурацца нашай мовы,
Заўжды на мове роднай размаўляць,
Бо хіба ёсць пяшчотней што, чым словы,
Якія з вуснаў матчыных гучаць.
Г.А. Паляшчук, настаўнік беларускай мовы і літаратуры.